Pairo ki Phati Adiya theek karne ke gharelu nuskhe (Home Remedies for Crack Heel)

Aksar dekha jata hain ki hum apne chehre par jyada dhyaan dete hain, lekin sharir ke anya parts par kam dhyaan dete hain. Aise mein sabse jyada andekhi to Pairo aur Adiyo ki karte hain, Jisse veh khurdari, hard ho jati hain aur unme badi-badi si darare aa jati hain. Jab bhi pairo mein crack padte hain to usay dekhkar tension hone lagti hain ki ab is problem se kaise chhutkara paya jaye. Aap fati Adiyo se bachne ke liye na jane kaun-kaun si cream aur lotion lagana shuru kar deti hain, Magar yakeen maniye isse ratti bhar bhi fark nahi padta. Pair jab hi phatate hain, Tab unke peeche koi na koi karan chhupa hota hain jaise nange paanv tahalna ya phir paanv ko hamesh dhool-mitti mein rakhna. Agar aapke pair bhi phatne shur ho chuke hain to bina deri kiye kuch gharelu upay apnaye.

Ghar par hi Scrub taiyaar kar Adiyo ko ragde ya phir pairo ko garam paani aur Nimbu ke mishran mein dubo kar usko acche se saaf kare aur phir cream ya lotion lagaye. Saath hi apni diet ka bhi khas khyaal rakhe. Aahaar hamesha paushtik hona chahiye aur usme Zinc, Vitamin E aur Omega-3 ka khas mishran hona chahiye. Isse skin dheere-dheere acchi honi lagti hain aur Crack Heels ek-dum se sahi ho jate hain. Apne pairo ko hamesha nam rakhe kyonki pairo mein koi Oil gland nahi hota, Jisse veh rookhe sookhe aur gande ho jate hain.

To agar aapko bhi apni Fati Adiyo ka darr sata raha hain to, Ajmaiyiye hamare bataye gye nuskhe ;-

Adiyo ki safaai kare ;- Nahate samay apni adiyo ko scrub se saaf kare, Jisse Dead skin aur gandagi nikal jaye. Rojana nahate waqt aur kanhi bahar se ghar lautne par apne pairo aur adiyo ko garam paani mein daal kar saaf kare. Isse unpar gandagi nahi rah payegi aur infection nahi phailega.

Pairo ko saaf karne ke liye Anti-septic saabun ka istemal kare. Isse pairo ki bacteria se raksha hogi aur tavcha ko aaram milega.

Pairo aur Adiyo ki dead skin ko hatane ke liye Pumice stone ka istemal kare. Yeh dead skin ko asaani se hata dega, Lekin iska istemal bahut pressure ke saath na kare.

Pairo ko saaf karne ke liye Ek tub mein garm paani lekar usme 1 chammach Epsom Salt daale aur kuch der tak pair daal kar baith jaye. Thodi der baad theek tarah se safaai kare, Isse dead skin asaani se nikal jayegi.

Pairo ko adhik samay tak geela na rakhe, acchi tarah se sukhne ke baad lotion laga le.

Khoob paani piye ;- Jitna ho sake, Adhik matra mein paani piye, Isse sharir mein nami ka level bana rahega aur adiya bhi narm rahengi. Rookhi tavcha hone par adiya jald phatati hain.

Adiyo ko nami pradan kare :- Pairo mein Tel granthi nahi hoti hain, Isliye veh hamesha rookhe bane rahte hain. Iske liye aapko raat ko sone se pahle tel ya cream se massage karni chahiye. Pairo ki jaroori nami banaye rakhe. Accha moisturizer lagane ke baad sooti moje pahne, taki nami barkarar rahe aur narmi bani rahe. Aap chahe to Tel ka istemal bhi kar sakte hain.
  
Glycerin ka ghol :- Aadhi Baalti mein Glycerin daale aur 10 minutes ke liye usme pair daalkar baithe. Uske baad thande paani se pair dho le aur apne aap sukhne de. Phir lotion laga kar pairo ko nami de.

Chappal ki jagah joote pahne :- Agar aap chappal ki jagah joote pahnengi to aapki adiya bachi rahengi. Band joote pahanne se pair rookhe nahi hote hain aur hamesha saaf bane rahte hain. Aaramdeh joote ya chappalo ka chayan kare. Dhyaan rakhe ki joote na to bahut tight ho aur nahi dheele ho. Bahut hard shoes aapke foot mein dard paida kar sakte hain.

Jooto mein preshani ho, to Aidi ya pair ke peeche wale hisse par Tape chipka le, Phir joote pahne. Isse chalne mein preshani nahi hogi aur pairo par nishaan bhi nahi banenge.

Namak :- Aadhi Baalti paani mein mein 1 Chammach Namak daale aur mix kare. Namak se aapke pairo ki dead skin nikal jayegi aur pair bhi komal ban jayenge.

Kele ka guda :- Phati Aidiyo par Kele ka guda lagayiye. 10 Minutes tak chhodne ke baad thande paani se dho lijiye. Jab tak Pair sahi na ho jaye tab tak ise din mein 1 baar jaroor kare.

Papite ka guda :- Rookhe pairo ko pake huye papite ke gude se massage kare. Isse pair aur jyada nahi fatenge aur skin mulayam ho jayegi.

Nimbu :- Pairo ko Nimbu aur Garam paani ke ghol mein 15 minutes ke liye duboye. Pairo ko scrub kare, dhoye aur phir moisturizer cream laga kar moje pahan le. Pairo aur Adiyo par kata hua Nimbu ragadne par safaai behtar hoti hain aur narmahat bani rahti hain. Kam se kam hafte mein ek baar iska istemal jaroor kare.

Tel massage :- 20 Minutes ke liye Tel massage kijiye aur 1 ghante ke liye pairo ko aise hi chhod dijiye. Aisa hi hafte mein teen baar raat ko sone se pahle kare.

Doodh aur Shahad ;- Doodh aur Shahad ko ek saath milayiye aur apne pairo ko usme 15-20 minutes ke liye daal dijiye. Phir thoda sa scrub kijiye aur baad mein garam paani se dho lijiye.