In cheezo ko ek saath mila kar khayiye aur payiye good health.

Inhe ek saath mila kar khane se health par direct effect padta hain. Aisi kai cheeze hain jinhe ek saath khane se aapko kafi fayda ho sakta hain aur aap healthy bhi rah sakte hain. Aaj hum aapko aisi hi kuch cheezo ke baare mein batane ja rahe hain, Jinhe ek saath mila kar khane se duguna fayda milta hain.

Greeen Tea + Lemon = Healthy Heart 

Green Tea health ke liye bahut hi acchi hoti hain aur heart attack ke khatre ko kam karti hain. Agar aap Green Tea mein Nimbu ka ras mila lete hain to yeh aapke dil ke liye aur bhi faydemand ban jati hain. To agli baar aap jab bhi green tea banaye to usme kuch boonde Nimbu ke ras ko jaroor milaye.

Broccoli + Tamatar = Cancer se bachaav 

Tamatar aur Broccoli dono hi cancer ke khatre ko kam karte hain. Ek research ke mutabik agar in dono ka ek saath istemal kiya jaye to yeh aur bhi jyada faydemand rahte hain aur hamare sharir ko cancer se suraksha pradan karte hain. Iske liye kam se kam dedh cup Broccoli aur dhaai cup tamatar ka sewan karna chahiye.

Red Bell Pepper (Lal Shimla Mirch) + Black Beans (Kale Sem) = Immunity ko banaye strong

Khane mein Red Bell Pepper aur Black Beans ko shamil kare. Beans mein kafi matra mein Iron milta hain. Red Bell Pepper mein milne wala Vitamin C is Iron ko asaani se pachaane mein madad karta hain. In dono ko ek saath khana faydemand rahta hain.

Avocado + Green Salad = Skin ki Suraksha 

Green Salad mein agar Avocado (Ek tarah ka phal) mila kar khaya jaye to aapki skin ko bahut hi jyada fayda milta hain. Iske sewan se aapki tavcha suraj ki khatarnaak UV kirano se bachi rah sakti hain. Yeh salad healthy hone ke saath-saath tasty bhi hota hain.

Khubani + Badam = Cholesterol kam kare 

Research ke anusaar Badam mein aise tatv paye jate hain, jinke saath agar Vitamin E aur C ka sewan kiya jaye to cholesterol ko kam kiya ja sakta hain. Yeh dono Vitamin Khubani mein paye jate hain. Isliye agar Badam aur Khubani ka sewan ek saath kiya jaye to yeh bahut hi faydemand hote hain.

Lahsun + Pyaaz = Seer se paanv tak tandrusti 

In dono mein aise tatv paye jate hain jo hamare liye behad faydemand hote hain. In dono ka ek saath sewan karne se tandrusti milti hain aur kai bimariyo se chhutkara bhi milta hain. Lahsun aur Pyaaz ko ek saath pakane se khane ka swaad bhi badh jata hain. Aap  inka istemal kai tarah ki sabziya, soup, curry aadi mein kar sakte hain.

Dalchini + Whole Grain Toast = Wajan kam kare 

Dalchini ke sewan se aapki blood sugar ka level ekdum sahi ho jata hain. Jisse aapki energy badhti hain aur saath hi aapko bhookh bhi lagti hain. Experts ka manana hain ki fresh Cinnamon ka sewan karna aur bhi jyada labhdayak hota hain aur wajan bhi kam hota hain.