Janiye aapka rail ticket kya kahta hain.

Rail yatra ke dauran agar  hamari nazar agar kisi cheez par kam jati hain veh hain hamara  rail ticket. Lekin ticket par likhi har baat ka matlab aapko pata hona  bahut jaroori hain. Rail ticket par likhi code bhasha ka matlab janiye. 

Kitni tarah ke reservation 

Yeh janana interesting hain ki Indian railway mein reservation kitni tarah ka hota  hain. Is samay aap Indian railway mein 3 tarah ke reservation pa sakte hain.

-         Ticket window par jakar traditional tarike se reservation

-         Online E-reservation

-         Online I-Reservation

E aur I Ticket

Aajkal E-ticket yani ki electronic ticket ka zamana hain. Har koi ticket reservation ke liye computer ka istemal kar raha hain. Yaha reservation ke 2 option hain. E-Reservation aur I-Reservation. Bhale hi dono reservation ghar baithe  computer se karwaye jate ho, Lekin inme kuch antar bhi hain.

-         Agar  aap physical ticket (Original print ticket) chahte hain aur ticket window par jane se bhi bachna chahte  hain toh aapko I-ticket lena chahiye. Yeh ticket Indian Railway post office ke jariye aapke address  par bhejti hain. Kahne ka matlab yeh hain ki I-Ticket ko aap online reserve karwa sakte  hain aur jaisa ki normal reservation ticket jo ki reservation window par milti hain, Vahi ticket aapko milegi, lekin yeh aapke ghar ke address  par post  ke jariye aayegi. 

-         I-Ticket diye gaye  pate par post ke jariye pahuchta hain. I-ticket ke  liye yatra  ke  3 din pahle booking karwani padegi, jabki E-Ticket yatra ke kuch ghanto pahle bhi book ki ja sakti hain. 

-         I-Ticket ke liye aapko daak kharch bhi bharna padega, Jabki E-ticket mein aapka kaam print out ya sms ke jariye  bhi chal jata  hain. 

-       E-Ticket ke aap kai saare print nikaal sakte  hain. I-ticket lene ke liye aapko phir se  dobara  charge dena padega. Dobara I-Ticket pane ke liye aapko apna PNR number  bhi yaad hona chahiye.

Passenger  ki pahchaan PNR No.

Ticket window se liye gye  aam reservation ticket ke left side  ke  upar ki aor yeh number  hota  hain. Yeh  number  unique  hota  hain aur ise passenger name record  kaha jata hain. Yeh ticket aapka hain aur aap hi safar  kar  rahe hain iska pata  is pnr no. se hi chalta hain. Rail ka ticket  yunki non-transferable hota hain isliye aapke ticket par koi aur safar karne ka adhikari  nahi hain. Is lihaaz se  yeh  number aapke aur railway dono ke liye bahut hi important hain. Internet ya phone , kisi bhi madhyam se apne ticket  par yatra  ki jankari  aapke PNR no. ke jariye hi milegi. Accha hoga ki safar ke  shuruvaat se pahle PNR  number ko kanhi likh le ya mobile mein save karle. Kyonki ticket kho jane ki haalat mein yeh  aapki madad karega.  PNR number ki madad  se aap train number, train ka naam, destination ki jankaari, safar ka class, ticket ka status, passenger coach aur seat ka number pata kar sakte hain.

Route  ki janam-kundali hain ‘train number’

Reservation ticket par jo dusra  important number nazar aata hain veh  hain train number . Aisa nahi hain ki yeh  number  bas  aise hi likh diya gya hain. Train number  5 digit ka hota hain aur iska har number kuch na kuch kahta hain. Pahla numer  yeh  batata  hain ki aap jis train mein safar  kar rahe  hain, veh kis tarah ki passenger  train hain. Aapko thoda  idea  dete  hain – Agar aapke  reservation ticket par  likhe train number ki pahli digit  0 hain toh aap summer special, holiday special ya anya  special  train mein safar karne  wale hain. Agar pahli digit 1 ya 2 hain toh lambi doori ki train hain, jisme rajdhani aur shatabdi jaisi trains  shamil hain. 3 Number se  shuru hone wale train number Kolkata  ki local train ka hota  hain. 4 number se shuru hone wala train number Delhi, Chennai, Secundrabad jaise  metro city ki rail services  ka hota  hain. 5 number  traditional tarike ki train ka hota  hain. 6 number se shuru hone  wali train memu hoti hain aur 7 number  se shuru hone wali demu. Haal hi mein reserve  ki gyi train ka number 8 hota hain aur 9 number se  shuru hone wali train Mumbai ki local hoti hain. Isi tarah aage  ke  chaar digit  bhi alag-alag tarike se  train ke bare mein puri jankari dete  hain. Indian railways ke expert  train number  dekh kar train ke route  ki puri  jaankari de  sakte  hain.

 Iske  alawa reservation ticket par asaani se samajh aane  wali jankari  jaise ki train yatra ki doori, taarikh, Adult aur bachho ki jankari  aapko asaani mein samajh aa jayegi. Iske  alawa ticket ka ek number bhi hota hain, jisse jaroorat padne par yeh  pata lagaya ja sakta hain ki yeh kahan se  liya gya hain. E-ticket par aapko ticket number ki jagah transaction  number milta  hain. Iske neeche aapko aapki  journey  ka class aur aane-jaane ki jagah  ka naam milega.  E-Ticket par toh aapko apna phone number aur  pata likhne ka option bhi milta hain jo printout mein saaf  dikhta hain. Agar aapka ticket confirm hain toh koi baat  nahi lekin agar kanhi waiting ka chakkar hain toh railway ki English ki class phir se join karni padegi.

WL  ka chakkar 

Apne ticket ke confirm na hone ki tension to aapko hogi, saath mein short form mein likhe angreji ki kuch axar aapke dil ki dhadakne aur badhayenge. Aaiye nazar dalte  hain waiting list ke kuch aise hi short  form aur unke matlab par.

RLWL :- Iska matlab hain remote location waiting list. Agar  2 bade  stations ke beech ka koi aisa station hain, jaha se jyada trains mauzood nahi hain toh vaha ke yatri ko kisi cancellation ki stithi mein pahle seat di jayegi. Agar is tarah ki waiting  list jyada bhi hain phir bhi seat milne ke chance jyada hote hain.

PQWL :- Kai chhote stations ko jaroorat ke hisaab se kote mein se kuch seat di jati hain. Agar aap in stations se  apni yatra shuru kar  rahe hain aur aapka ticket waiting mein hain to aap pulled  quota  waiting  list mein aa jate  hain. Iska matlab hain pulled quota  ke saare  ticket reserve  ho chuke hain aur  aap oos quota ke waiting  list mein hain.

CQWL :-  Jab aap tatkaal quote mein ticket lete hain aur aapki ticket waiting mein hoti hain, toh ise current quota waiting list mein rakha  jata hain. Aamtaur  par is  tarah ki waiting  10 tak  hone  par confirm ho jati hain.

RQWL :- Ise request waiting  list kahte hain. Agar route mein koi pulled quota nahi toh is tarah ki waiting list ko banaya jata hain.

Quota tere kitne naam :-

LD :- Ladies quota

HQ :- High official ya Headquarter Quota

DF :- Defence Quota

OS :- Outstation Quota

RS :- Road side quota, Bade stations ke beech ke aise stations jo computerized network se na jude ho tab unhe road side quota mein rakh kar ticket reserve ki jati hain. Isme waiting list bhi hoti hain.

PH :- Parliament House Quota

FT :- Foreign Tourist  Quota

DP :- Duty pass quota

HP :- Handicap Quota

SS :- Senior Citizen Quota

Up-Down ko bhi samajhe :- 

Jis station se train shuru hoti hain aur apne destination ki taraf jati hain, veh Up train kahlati hain. Vapis aane ki yatra ko down journey kahte  hain.  Agar koi Train Amritsar se Mumbai ke liye shuru ho rahi hain toh ise Mumbai ki aor UP train kahenge, Jab yeh train  Mumbai se vaapis aayegi to ise Down kahenge. Down train ka number Up se  ek jyada rahta hain. Jaise agar  Up train ka number 15707 hain toh down ka number 15708 hoga.

Seat bhi jaan le :- 

Agar aapki ticket confirm hain toh Seat number ke alawa ticket dekhkar  aap uski position bhi jaan sakte hain. Agar aapki birth number ke samne LB likha hain toh iska matlab Lower yani neeche wali birth , Agar likha hain MB toh iska matlab Middle Birth, UB ka matlab Upper  Birth. Iske alawa agar SU aur SL likha hain toh iska matalab Side Upper aur Side Lower birth hain. Railway Senior Citizen ko Lower seat dene ki koshish karta hain, Agar aisi seat available  ho to hi. Online reservation karwane par availability ke hisaab se aap khud hi seat choose kar sakte hain.