English bolna seekhne ke liye jaroori tips.

Aaj ke zamane mein English language ki jankari nahi toh acchi job milna mushkil hain. Kai baar toh aisa bhi hota hain ki English bolne ke darr se aap parties aadi mein jane ka program aadi bhi cancel kar dete honge. Wajah saaf hain ki English na bolne se aapko insult face na karna pade. Lekin agar aap English ko lekar apne mann mein aisa hi darr bana kar rakhenge toh kabhi bhi English nahi seekh payenge. Aaiye jante hain aise kuch tips aur tarike ke bare mein jinse aap English ko badi hi asaani se seekh sakte hain.

• Daily ek naya word (shabd) seekhe :- Ek shabd roj seekhe aur isko alag-alag tarah se bole. Is sabd ko jab tak bole jab tak aapko yaad na ho jaye. Ho sake toh ek diary banaye aur daily update kare.

• Sahi se pronunciation kare :- Jo bhi aap English mein aap sunn rahe ho usay dhyaan se uska matlab samajhte huye sune. Kisi word ko agar aap sahi se bol nahi paa rahe hain toh Google se uska sahi Pronunciation check karke bol sakte hain. Iske liye aapko Google Translate mein Audio button ko press karke oos word ka sahi uchharan (Pronuciation) soone.

• English club join kare :- English seekhne ka sabse accha tarika hain koi aisa class join kare jaha par aap apna sauk pura karne ke saath English seekh le. Ek teer se 2 shikaar. Cooking ka saunk hain toh koi aisi Cooking class ya English club join kare jaha apne shaunk ke saath yeh bhasha bhi aap seekh sakenge.

• English mein sochna shuru kare :- Jo aap sochte hain veh aapke word ban jate hain. Isliye English bolne ke liye sabse pahle English mein sochna shuru kar de. Sabse pahle aap confident hokar English mein bole chahe aap galat hi kyon na bol rahe ho. Dheere-dheere practise se aap naye-naye word seekhenge aur aapme confidence aayega. Lekin iske liye aapko basic seekhne honge. Kyonki thodi jankari hamesha nuksaandayak hoti hain.

• Aise dost banaye jo English mein baat karte ho :- Dosto ki jaroorat kewal mauj-masti, ghoomne-phirne aur cinema dekhne ke liye nahi hoti hain. Kabhi-kabhi aise dost banaye jo aapki madad kar sake. Agar aap aise dost banayenge jinko Angreji acchi tarah se aati hain toh aapko fayda hoga. Apne dost se behichak kisi word ka matlab puch sakenge, Aakhir har ek friend jaroori hota hain.

• Mirror ke saamne khud se baat kare :- Sirf English seekhna hi sabkuch nahi hota hain, uccharan bhi bahut mayne rakhta hain. Apne uccharan ko perfect banana chahte hain toh rojana 1-2 ghante sheeshe ke saamne English bolne ki practise kare, Isse aapka confidence bhi badhega aur saath hi aap dusro ke saamne acchi English bolne mein bhi kamyab honge.

• Jor jor se padhe :- English seekhne ka best tarika hain daily routine mein newspaper shamil kare. Koshish kare aap apne kamre mein rojana ek ghante tak English Newspaper ya magazine ko zor-zor se padhe.

• Dictionary use kare :- Agar padhte huye ya kisi se baat karte huye aapko kuch naya sabd sunne mein aaye toh turant usay dictionary mein khoje. Taalenge toh taalte rah jayenge, Isliye koshish kare jab bhi kuch naya sune usay Online Dictionary mein search kare. Aisa karne se aapki vocabulary to majboot hogi aur saath hi aap jald hi English mein Master ho jayenge.