Kar rahe hain IAS ki taiyaari toh in baato ka rakhe khyaal.

Aksar sunane mein aata hain ki I.A.S. ke exam mein safal hone ke liye daily 16 se 18 hours ki study karna jaroori hain. Is exam ki taiyaari  kar rahe  yuvaon ko kai baar  yeh salah bhi di jati hain ki veh sirf padhaai par dhyaan de aur zindagi ki baaki saari  cheeze bhool jaye. Kuch log toh yaha tak yeh bhi salah dete hain ki aap khud ko ek kamre  mein band kar le aur baaki kaamo mein kam samay zaaya karte  huye saara time, bas study ko hi de, tabhi aap IAS mein safal ho payenge.  

Sach toh yeh hain ki IAS ke exam ki taiyaari  karne ke liye  yeh katai jaroori nahi hain ki aap khud ko duniya se alag  kar le. Officer banne  ke liye  is  tarah ke sanyaas ki jaroorat nahi hain. Aap apni zindagi ko bilkul normal rakh sakte hain. Jaroorat kewal puri seriousness aur balanced study karne ki hain. Sach toh yeh hain ki aap manoranjan aur  aaram se door rah kar  aur sabhi cheezo se  katkar  padhaai karenge, toh padhaai acche se  nahi ho sakti  hain. Isliye aap padhaai ke saath saath apni hobbies aur  dusri roochion par  jaroor  dhyaan de. 

Quantity nahi Quality hoti hain jaroori :- Study ka relation iss baat se  nahi hain ki aapne  kitne  ghante  tak padhaai ki. Important yeh hain ki aapki padhaai ki gunvatta kya thi aur  yeh kitni prabhaavshali thi. Sirf  padhaai ki khaatir  padhai karne  aur ghante gin kar khush ho lene ka koi fayda nahi hain. Maan lijiye aapne  16 ghante tak kitaab  lekar baithe rahte hain, Lekin aap apna dhyaan na toh  padhaai  par  focus kar paa  rahe  hain aur  na hi aapko jyada kuch samajh aa raha hain. Ya maan lijiye aap subah 5 baje  uthakar  padhne  baith jaate hain, Lekin aapko apni neend khatm karne  ke  liye  preshaani ka saamna  karna  padta  hain. In dono  hi situation mein kya padhaai ke  ghante  wakai mein kaam aayenge. Aisi record  tod padhaai karne  ka kya fayda, Jisme ghante toh shaamil ho aur  padhaai na ke  barabar  ho. 

Discipline  aur  concentration :- Behtar toh yeh  hoga ki  aap saal bhar 9-10 ghante  padhe  aur  exam ke 1 mahine  pahle ise  badha kar  12 ghante  tak le jaaye. Ek baat aur  samajh le, Aap kitne ghante padhte  hain is baat se zyaada ahem yeh hain ki aap apni padhaai ek si kare. Bhale hi aap rojana kewal 5-6 ghante padhe, lekin is baat ka khyaal rakhe  ki saal bhar mein har roj kam se kam 5-6 ghante  jaroor  padhe. Yeh discipline banaye rakhe, yahi nahi kisi din 8-10 ghante padh lijiye aur kisi din 1 ghante  ke  baad chhutti kar  lijiye. 

Agar  baat  kare toh roj 12-12 ghante ki padhaai ek-aadh mahine  se  jyada  karna kafi mushkil ho jata hain. Lagatar  itne  ghante padhne se  hamara  dimaag  samajhne  aur grahan karne ki power par asar padta  hain. Apne focus ko ghanto tak kayam rakhna  mushkil hain. Isse  ubaai aane lagti hain aur mann se padhai uchat  jaati  hain. Zaahir hain yeh aapki padhaai ke lihaaz se bahut galat  hoga. 

Break  lena  bhi hain jaroori  :- Padhaai ke dauran yeh baat  dhyaan  rakhe ki ek baithak  jyada lambi na khiche. Yeh dekha gya hain ki dedh se do ghante  tak  lagatar padhna aur  phir  aadhe ghante ka break lena accha hota hain. Aisa karne se  study  karne ke  liye  energy aur  umang bani rahti hain. Isse concerentration  badhane mein  asaani ho jati  hain. 

Yeh bhi paya gya hain ki entertainment, Aaraam aur hobby bhi apni dincharya mein shamil karna students ki life  par  positive effect daalta hain. Baari  baari mehnat karne ke baad  manoranjan  ko samay dene  ke baad  dimaag  lambi padhai karne  ke liye  acchi situation mein aa jata hain. Isliye  padhaai ke  ghanto ke beech kuch break lena time  ki barbaadi ke roop mein nahi dekhna chahiye. Yeh padhaai ki quality ko banaye  rakhne ka ek  ahem  hissa  hain. 

 Kull mila kar  study  ke  hours nahi balki study  ki quality  mayne  rakhti hain. Tired, Tension aadi mein study karne se  koi fayda nahi mil sakta hain. Vahi acchi padhaai hoti hain, jo aaraam se aur  concentration ke saath  ho. Tabhi aap safal  ho sakte  hain.